Ri Ruwach'ulew (Tzijonem)

Ronojel ri k'o chuwäch ri loq'oläj ruwach'ulew nk'atzin chi qe pa qak'aslemal qonojel winaqi'. Ronojel ri k'o chi ruwäch, nuto' ri achi richin nikase'. Ri che' nïm rejqalem ruma, wi k'o che' k'o k'ïy ya', jeb'ël k'a nub'än ri qatiko'n: ri awän, ri kinäq', chuqa' nk'iyär k'a pe, nk'asäs nipe chuqa' nqajiq'aj jun utziiläj laj kaq'iq'. Ri nima'q taq che': ri ruxaq, ri ruq'a' kan janila nuto' ri achi rik'in ri rutiko'n chuqa' richin ye'uxlan jub'a' chi ruxe' toq nikitïj qa jun raqän kiway.

Töq k'o k'ïy che' jantape' nqa k'a ri loq'oläj jäb' ruma qetaman chi ri che' nroyoj ri jäb', k'o tinamït re', jantape' niqa ri jäb' ruma k'a k'iy na k'ichelaj kichajin ri winaqi'. Ruma wi xtik'is nchaqijär pe ri ruwach'ulew, man jun chïk tiko'n xtuya' ri ruwach'ulew, ri loq'oläj jäb' nik'is, ri qaya' xtichaqijär el.

K'atzinel chi nqak'üt, nqab'i j chi ke konojel ri winaqi', ri ak'wala', ixoqi', achi'a' richin man yekichoy ta chuqa' man yekiqasaj ta chïk ri che'.

Ri qati't qamama' yalan k'o nimaläj taq na'oj kik'in, akuchi nkib'ij chi, töq nqasäx jun che' k'o chi niqak'utuj utzil chi re ri Ajaw chuqa' nqak'utuj q'ij chi re', richin nqasäx ruma rije' k'o kik'aslem, achi'el jun winäq. Wi nqasäx jun che' k'atzinel chi ntz'et ri ik' wi setesïk rub'anon, k'a ri' ütz nqasäx jun che' richin ke ri':

• Wi nk'atzin richin si' kan jeb'ël nk'at, man jun ta sib'.
• Wi nik'atzin richin jun jay, man nichikopir ta ri che' chuqa' kan niyaloj ri jay.
• Wi richin nokisäx richin ch'atal, ch'akät, yakb'äl tzyäq chuqa' nyaloj.

K'atzinel niqetamaj ri nimaläj taq na'oj re' chuqa' tiqatzijoj chi ke ri qalk'wal, qamam richin ke ri' man jub'ey xtik'is ta man xtimestäx ta ri na'oj re'.

Xtzijon: Nery Felipe Sacuj Morales (6to. primaria, 13 años)
Tz'ib'anel: Tixojel, Nery Felipe Sacuj Morales
Tijob'äl: EORM, Misión Naciones Unidas,
Ruq'a' Tinamït: Aldea Las Canoas, San Andrés Semetabaj, Sololá