Nutzyagb'al (Pach'un Tzij)

Jeb'ël nub'anob'al,
jeb'ël nutinamit,
kib'anon ri wati't numama'.

Jeb'ël nutzyaqb'al kitz'ukun,
kina'ojin ri wati't numama'.

Chuwäch re nukamixa',
kiya'on kan ri rejqalem ri qate' ruwach'ulew,
re' rub'onil ri kajulew.
Chi rij re nukamixa', chi rij re nuchaket,
kiya'on kan runawal ri Kaqchikel tinamït.

Chuwäch re nuwexaj kib'anon kan,
retz'ab'alul ri gate' ruwach'ulew,
chuqa' nuk'üt ri nimab'äl k'u'x.

Kan käq, kan käq rub'onil re nupas,
chuqa' k'o pe rachib'al ri gate' ruwach'ulew chuwäch.

Nwach'äch', nwach'äch re nuxajab'
jeb'ël retz'ab'alul b'anon.

Jeb'ël rub'anikil re nuya'l,
chupam re nuya'l ninya' el ri nuwachinaq.

Jeb'ël rub'onil re nupo't
jeb'ël retz'ab'alul re nupo't
jeb'ël ruwi' rutelem re nupo't
re ruqul nuk'i t ri nimab'äl k'u'x.
Chuwäch re rut'islem re wuq
kan nqaq'omaj re rub'onil
ri qate' ruwach'ulew.

Re rukrusil re wuq nuk'üt ri kaji' ruxikin re ruwach'ulew.
releb'al q'ij, ruqajb'al q'ij, releb'al kaq'iq', ruqajb'al kaq'iq.

Jeb'ël rub'onil, jeb'ël retz'ab'alul re nupas,
nuq'ajuj ruchuq'a' ri maya' ixöq.

Jeb'ël retz'ab'alul re nusu't,
chuwäch re nqak'owomaj ri kaji' ruxikin ruwach'ulew.

Matyox chiwe ati't mama'aj,
xina'ojij, xib'än re nutzyaqb'al pa rub'eyal.

Wakami qonojel tijoxela'
yojkikot ruma jeb'ël ri qab'anob'al xiya' kan.

Man xkäm ta ri na' oj, man xkäm ta ri k'u'x.
matyox k'a chiwe chi man öj imestan ta kan,
öj itzu'un, öj itz'eton pe ronojel q'ij.

Majun ta achike k'a nqasipaj chiwe, xa xe' k'a re
jun b'oraj pom, xa xe' k'a re jun b'oraj b'olosaqil
yojkowin nqaya' chiwe, tik'owomaj k'a ja re' k'a
yojkowin nqaya' chiwe.

Matyox chiwe tata,
matyox chiwe nana,
säq iwi', säq ijolom
xiya', xib'än ri qab'anob'al.

Pach'unela': María Magdalena Meletz Cumes (1 ro. Básico, 13 años)
Alberto Chumil Yaxón (2do. básico,14 años)
Tz'ib'anel: Tijonel. Victor Chumil Chiroy
Tijob'äl: Maya' Tijob'äl Tz'olol Ya'
Ruq'a' Tinamït: Chotaq'aj Tz'oloj Ya', Tz'oloj Ya'